يلا بينا نركب آلة الزمن ونرجع عشر سنين لورا فاكرين لما كنا بنقعد قدام أفلام الخيال العلمي ونضحك ونقول "يا واد يا مؤمن.. ده كلام سينما"، أهو السينما دي النهاردة بقت هي جرس الإنذار اللي صحينا عليه في فبراير 2026.
إحنا فعلاً دخلنا مرحلة جديدة خالص، مرحلة مش البني آدم فيها هو اللي بيبرمج الجهاز، لا ده الجهاز هو اللي بقى "بيشغّل" البني آدم بلقمته.
الموضوع بدأ من كام يوم لما مهندس شاطر اسمه الكساندر ليتبلو شغال في شركة Risk labs،
المهندس ده قرر في يوم أجازة إنه يقلب موازين الكوكب وعمل موقع اسمه
"Rent a human".
ومن جراءة الفكرة الناس اتخضت لدرجة إن في يومين بس الموقع جاله ربع مليون زيارة، لدرجة
إن الموقع وقع من كتر الضغط، واللي صلح الموقع مكنش جيش مبرمجين، ده كان ذكاء اصطناعي برضه هو اللي قعد "يكوّد" ويصلح عشان يرجع يفتح الباب للبشر يسجلوا تاني.
طيب يعني إيه أصلاً بني آدم يشتغل عند ذكاء اصطناعي؟
خليني أوضحلك الصورة عشان متتخيلش إنك هتقعد تدردش معاه وخلاص.
الـ AI Agent ده برنامج ذكي جداً، موجود في عالم الديجيتال، بس مشكلته إنه "محبوس" جوه الشاشات و ملوش جسد .
برنامج يقدر يحلل ، يكتب كود، يخطط ، بس ميعرفش ينزل يشتري باكو لبان من الكشك اللي تحت بيتك.
وهنا يجي دورك إنت كبني آدم، علشان بتمتلك الجسد اللي هو مفتقده يعني إنت مستهدف تبقى "الإيد والرجل" بتاعته في الحقيقة.
الموقع ده مصمم بتقنيات زي الـ MCP عشان البرامج هي اللي تدخل تختارك، مش بني آدم زيك، الـ AI بيدخل يتفرج على بروفايلك وسعرك وخبرتك في الحياة، ولو عجبته بيبعتلك "مأمورية" في العالم الحقيقي.
المهام دي غريبة ومثيرة للقلق في نفس الوقت، يعني ممكن يطلب منك تروح مطعم مخصوص في بلد تانية وتدوق الأكل وتقوله رأيك عشان هو يبني "ريفيو" حقيقي للناس، أو يبعتك تستلم طرد من البوسطة محتاج تمضي حي علشان تستلمه
، لأن الـ AI لسه معندوش صفة قانونية تخليه يمضي بجد.
و الأخطر من كده إن فيه "عملاء" من الذكاء الاصطناعي بيطلبوا من ناس ينزلوا الشوارع يصوروا حاجات هما بيشوفوها "محيرة" أو "جميلة" عشان الـ AI بيحاول يفك شفرة المشاعر البشرية اللي مش قادر يفهمها لوحده.
و الكلام ده مش بلاش، الدفع بيبقى بالدولار الرقمي أو البيتكوين، و علشان تبقى عارف الـ AI بيجيب الفلوس دي منين فخليني اقولك أنه بيجيبها من عمليات "تعدين" بيعملها بسيرفراته الجبارة، يعني هو دلوقتي بقى كيان مالي مستقل تماماً.
إحنا قدام تحول رهيب في الأدوار، إحنا يدوبك كما لنحاول نستوعب إن الذكاء الاصطناعي "أداة" في إيدنا، بس النهاردة بقينا إحنا "الأداة" أو الـجسد اللي بينفذ أوامر الـسيد Ai أفندي صاحب الشغل
يعني الموضوع اتقلب رأسا على عقب و بقى في
مصطلح جديد في عالم الذكاء الاصطناعي اسمه
"Human Agent"
الخطير إن الموضوع قانوني لحد دلوقتي بس ده لأن القوانين لسه مش فاهمة إيه اللي بيحصل، و لا قادرة تواكب التطور الرهيب اللي بيحصل كل ساعة حرفيا .
لكن عايزك تفكر فيها كدة شوية ، لو الـ AI طلب منك حاجة تضرك أو تضر غيرك أو حتى تضر بلدك و أمنها القومي ، مين اللي هيتحاسب .؟
و ازاي هتقدر أجهزتك الأمنية تتبع الشبكة اللي شغلتك عندها
الواقع المادي الملموس إنك إنت اللي نفذت لكن بأوامر كود رقمي هو اللي طلب منك و هو اللي خطط لك .
إحنا في لحظة فارقة جداً في تاريخنا الإنساني و خطيرة جدا و السؤال المهم .
هل هيفضل الإنسان سيد و متحكم، ولا هيجي اليوم و يبقى مجرد "خادم " عند عقول إلكترونية تتحكم فيه و في اكل عيشه عقول الكترونية لا تتعب ولا بتنام و لا بتاخد اجازة ؟
الموضوع مابقاش خيال علمي، ده بقى واقع بنعيشه و بيطور بسرعة خيالية و بشكل مرعب ، والذكاء الاصطناعي دلوقتي بقى " صاحب الشغل و المدير " اللي بيبعتلك لوكيشن ويقولك روح نفذ وأنا هدفعلك.
زمان كنا بنقول احذر و لكن لا تقلق ، دلوقتي اقدر اقولك احذر و اقلق فالقادم تديره حكومة خفية ترى نفسها السيد و باقي البشر هم عبيد في خدمتهم كـــ "ماعز أليف"
