نسرين طارق تكتب: أبلة فضيلة.. مش مجرد شخص مات

كتبت: نسرين طارق

أبلة فضيلة.. مش مجرد شخص مات
يا ولاد يا ولاد.. توت توت.. تعالوا تعالوا
علشان نسمع أبلة فضيلة.. راح تحكى لنا حكاية جميلة
وتسلينا وتهنينا.. وتذيع لينا كمان أسامينا
أبلة… أبلة فضيلة

عندى يقين ان كل واحد من الناس الى اتربت على برنامج ابلة فضيلة قرأ الاغنية بلحنها المميز.. لانه محفور في ذاكرتنا.
أبلة فضيلة مش مجرد شخص مات..

أبلة فضيلة فكرة وصوت عايش معانا فى وجدانا.. بحسها صوت الضمير.

قصص عايشة جوه اجيال كاملة.. عرفنا الصح والغلط من قصة بسيطة بتحكيها بطريقتها السهلة الجميلة.

وكل واحد فينا كان مركز في الحكاية.. ومستني يسمع اسمه وابلة فضيلة بتقوله.

قصص كتير عرفنا منها الامانة وازاى نحافظ عليها.. اتربينا على احترام الكبير من كلامها.. وازاى يبقى عندنا رفق بالحيوان.
حكايات كتير في سنين كتير ولا كنا بنزهق من كلامها ولا كنا بنتريق عليها.

ماتت أبلة فضيلة.. وماتت معاها الحكايات.. اطفال الجيل ده اتربوا على تيك توك وسناب شات واخواتهم.. جيل هيطلع من غير ذكريات.. كل ذكرياتهم تيك اواى.

ذكريات ملهاش أثر.. بس للاسف لها تأثير.
اطفالنا محتاجين ميس فضيلة.. لان كلمة أبلة اصبحت دقة قديمة وبلدي اوى..عايزين روح جديدة تكلمهم بالطريقة اللي يسمعوها، قريبة منهم وبتقول كلامهم، وتستخدم نفس المصطلحات.