نسرين طارق تكتب: معروفة.. الإنجاز عربي والإخفاق مصري

كلنا طبعا بنقرأ الأخبار سواء على مواقع الأخبار الإلكترونية أو على السوشيال ميديا أو باستخدام أي وسيلة.
منذ أعوام ليست بعيدة الدول العربية وبالأخص الخليجية أصبح عندهم مواقع أخبار وجرايد يكتبوا فيها الأخبار.. ده بعد ما بقى عندهم أخبار يكتبوها اصلا لأن زمان مكنش عندهم حاجة يكتبوها.
من الملاحظ أن أي إنجاز يحققه شخص مصري سواء عالم أخد جائزة نوبل أو أديب روياته انتشرت في العالم كله أو لاعب حقق إنجاز في مجاله أو ميدالية في لعبة معينة، أو فريق مصري حقق طفرة أو اكتشف حاجة جديدة.. تتبارى المواقع العربية في كتابة الخبر بعنوان “إنجاز عربي” وبعدها باقي تفاصيل الخبر.
أما في حالة إخفاق أحد اللاعبين المصريين يتكتب الخبر “فشل مصر” في كذا كذا.
يعنى بالبلدي كده في الهم مدعية وفي الفرح منسية.. لما يبقى إنجاز ونتائج مبهرة يبقى الإنجاز عربي لكن لما يبقى إخفاق ونتائج مخزية يبقى مصري.
فى حين أننا بنشوف نفس المواقع لما بتكتب خبر عن نجاح أي شخص من جنسيات تانية بيكتبوا مثلا حقق اللاعب الجزائري فوزا تاريخيا.. يعنى مش بيبقى عربي وقتها!!!
ولو حصل فشل يبيقى فشل اللاعب مش فشل الدولة عكس ما بيكتبوا عن مصر إذا أخفق لاعب يكتبوا فشل مصر فى الحصول على ميدالية في كذا.
يعنى حتى مش جايين معانا فى الإخفاق.. لو أنجزنا يبقى عربي لو اخفقنا يبقى مصر.
المثير للدهشة أن المواقع المصرية بقت بتعمل كده.. لدرجة أنهم بينقلوا الخبر نصا من المواقع العربية، وده غريب جدا.. طيب المواقع العربية بتعمل كده علشان تتمسح في إنجازك.. أنت بتعمل كده ليه؟
انت صاحب الفرح مش من المعازيم.
استفيقوا يرحمكم الله وكفاية دونية وانبطاح.. مصر دولة عريقة وكبيرة ولها انجازات ومعجزات على مر التاريخ ومن قبل التاريخ كمان، وفي كل المجالات فلك وطب وعلوم ورياضيات وفنون وعمارة وأدب حتى مجال التجميل والأزياء احنا اللى ابتكرناهم، وغيره كتير جدا من إنجازات المصريين في كل مكان في العالم.
هما اللى محتاج يتمسحوا فينا ويكتبوا إنجاز عربي.