سلاح ايه بس يانشأت صلي عالنبي مش للدرجة دي، لا ياحبيبي ماهو ده من القوى الناعمة اللي بقالنا سنين بنهاتي فيها؛
برنامج رائع في كل شيء وفكرته خلت الناس “اللي سمعوا عنه وشافوه بس” ماشيين في الشارع يقولوا للناس ياعم روح اتفرج عالكونتينر وبص بلدك بتصنع ايه، طب ليه بتتك اوي على كلمة اللي شافوه بس،
عشان دي الغلطة اللي وقع فيها القائمين على البرنامج.
انا مبدأيا كل ما أسأل حد يقولي برنامج ايه ده لا منعرفوش، لا مشفتش، لا مسمعتش عنه…
ده انا بقول لوالدي عنه قام قايلي الله لا معرفش عنه حاجة وريني، وبعد ماشافه كان بيصقف من الفرحة،
فبيسألني بيتعرض فين بقى: قلتله على اون كل سبت وحد واتنين وتلات الساعة ٧:٤٥ م
واحنا بنزل كل الحلقات عندنا يابابا في البوابة مكتوبة عشان اللي مشافش يقرا،
قالي ماشي كتر خيركم طبعا، بس يعني برنامج زي ده يتعرض..
قمت مقاطع والدي قلتله عندك حق حضرتك شايف انه لازم يتعرض على كل القنوات مش كده؟
قام قايلي طبعا هي محتاجة دي يعني قواعد إعلام ولا حد يأمر.
وفعلا انا من ساعة مابدأ البرنامج وانا طاير بيه، بس أول ماعرفت تفاصيل تسويقه حزنت،
لأن ببساطة برنامج زي ده مادام قررت أصلا تعرضه عالتلفزيون يبقى لازم تعامله معاملة مسلسل رمضان اللي هيبيضلك دهب، وتعلقله بيل بورد في كل حتة في مصر وتسوقله كويس جدا جدا على كل المنصات، مش تعمله صفحة فيسبوك يوم شغالة ويومين لا.
المفروض يافندم ترمي كل قواعد الإعلام الرتيبة دي ورا ضهرك وتعرضه على ٤ قنوات كبيرة عالأقل وفي اوقات مختلفة، عشان أحول من هنا ألاقيه هنا.
عارف امتى حضرتك تنفرد بيه لقناة واحدة بس؟
لما يبقى عندك من نوعية البرامج دي خمسة ستة، انما برنامج واحد يتيم، خلى كل اللي اتفرج عليه رقبته في السما وتقوم حاشره في قناة واحدة بس!
هو احنا هدفنا ربحي اصلا من برنامج زي ده؟
ماتبصوا عالهدف ياجماعة الهدف ياقوم، الهدف يافندم، الهدف فين يا أساتذة؟!
البرنامج ده يتسوق ويترجم كمان خليج وأوروبا، متضيعوش الشغل الحلو ارجوكم في قوالب اعلامية ماتت خلاص.
هذه النوعية من البرامج تستحق الإبداع في التسويق بشكل مختلف تماما.. ارجوكم ركزوا عالهدف.. الهدف يافندم.
