نهال سماحة تكتب: الوصايا العشر من “ثريدزجية قديمة”..لاستكشاف عوالم ما وراء التويتر
خمس حاجات لازم تعرفها عن تطبيق ثريدز، اللي هو خيوط بالعربي إن شاء الله ركز عشان ممكن المنهج يزيد عن خمسة
١. أول حاجة هو تبع انستا يعني الدخول ببلاش اتفضلوا معانا يا ألف مرحب..
٢. تاني حاجة عشان تحذفه لازم تحذف انستا يعني دخول الحمام مش زي خروجه يا شابة!
٣. تالت حاجة مارك مستوحيه بالمسطرة من تويتر يعني بلاش أسئلة من نوعية التطبيق بيشتغل ازاي.
٤. رابع حاجة هتلاقي أصحابك معظمهم أول بوست ليهم من سكة اس اس اس اتنين أربعة سته اس اس فراشة الحاج وردة بتمسي وبيفتتحوا التطبيق فماتتخضش رش ماية وأفرش جمبهم.
٥. خامس حاجة تعريب التويت علي Twitter إنك بتغرد لكن التعريب علي Threads اللي هو خيوط إنك بتدي طرف خيط عشان إحنا مش في مصنع ملابس كفاية قلبناها قهوة ورشينا ماية ..
آخر حاجة إللي محضرشي الإفتتاح ملوش كيس ملبس ومش هيتصور مع ميكي والدبدوب.
أخيرا إنتظروا ملخص مادة الكيمياء
تعديل.. الحاجة البعد الأخيرة ركزوا في الكتابة عشان هناك مفيش تعديل لو غلطت أمسح وعيد عادي باي.. لأ باي إيه
أفتكرت الخيوط كانت طايرة من دماغي شوف يا سيدي
٦. تقدر تعمل استوري بس مش بتبقي علي ثريدز بتبقي علي انستا، وفي الخلفية لوجو ثريدز عشان تبقي عارف مين جاي من فين سهلة ماتقلقش واللوجو علي شكل خيوط رأيها علامة @
٧. لو فاكر المنتصر بالله في مسرحية شارع محمد علي لما قال تراهني إني هضرب نفس الراجل هو هو بالقلم علي قفاه علي حد تعبير المنتصر بالله، لو فاكر الأفيه فهو بالظبط اللي مترجم في زرار مخصوص لنشر الخيط بتاعك من ثريدز والتغريد بيه علي تويتر بس زي العادة بيروح علي شكل رابط أضررررب.
٨. في لاوف مش لايك وأهو من نفس سكة انستا وفي إعادة نشر أنا مسمياها #ري_خيوط إن شاء الله، وكمان أوبشن أنك تعلق وتدلو بدلوك يعني بص هتنبسط.
٩. لو فاتك أول يوم في الكيلاس، فأغلبه كان مشاهير وناس عادية بتهزر بس وبتضحك بنسبة ٨٠% وناس جاية من ناشونال جيوجرافيك بتستكشف ما وراء التويتر بجدية ووقار ودول ١٠% والعشرة في المية الأخيرة مواقع أخبار وصحف وشركات ومؤسسات داخلة بتأدي نفس أداءها ما عملتشي أبتكار بشلن ولا أي حركة جديدة تناسب الإجرام اللي أحنا فيه يا أبو موتة.
باقي التركات هتعرفها يوم ورا يوم.. حبيبي
آه حاجة أخيرة .. الأيقونة بتاعة التطبيق هي علامة @ بس حرف الA معمول كده a براس يعني، ليه بقي؟! عشان فكرة الخيوط إللي قايم عليها الapp ومش بتاعة القماش لأ، بتاعة سلسلة الأوامر البرمجية والشبكة العنكبوتية والصداع ده، سيبك أنت و هات بيتزا و بيبسي وأعمل أكونت وركز عشان في تطبيق تاني اللوجو بتاعه لونه موف هتتكعبل فيه علي جوجل استور، وأفتكر إني حذرتك عشان باقات الناس مش لعبة ماشي.
