«مستر إكس».. فيلم كوميدى بطله لا يضحك.. وإفيهاته تعتمد على الإيحاءات.. رغم أنه مصنف +12

متابعة – غرفة التحرير

“مستر إكس”، الفيلم تصنيفه كوميدي ، والمفروض أنه نازل السينمات علي أنه مناسب من أول 12 سنة، مع أن أنا شايف أن الفيلم ده علي الأقل 16 سنة لأن في إيحاءات لا تصلح ل 12 سنة خالص.

ويفيد النقد الذى أعدته الصفحة الزميلة بموقع الفيس بوك، المخرج، أن الفيلم يدور حول شخص متعقد من الستات و عامل منظمة تساعد الرجالة أنهم يطلقوا ستاتهم بس بيقع في حب واحدة محامية ويبدأ يختار بين إنه يكمل في سكته ، ولا يكمل معها نفس تيمة بتاعه نادي الرجال السري كده في جزئية المنظمات دى.

الفيلم مش شبهه عامة بس نفس الفكرة بتاعة الشخص اللي بيقود حاجة في حتة فانتازيا كده بين الرجالة والستات ،،

الفيلم ده العنوان الواضح جدا فيه اللي وصلني أنه (أحمد فهمي ) عامل الفيلم ده تحدي تحت بند..
( هنجح يعني هنجح ) يعني تحس أنه بعد تجربتين مش أنجح حاجة ونال فيهم نقد كتير خاصة في الكوميديا بعد انفصاله عن الثلاثي، قرر أنه يعمل فيلم يتحط فيه كل حاجة ممكن تخلي فيلم ينجح مع الجمهور “عافية”، عشان أبقي نجحت لوحدي زي ما لما بشتغل مع حد تاني ، فهجيب ضيوف شرف أكتر من ممثلين الفيلم أصلا وكلهم كوميديانات ومحبوبين سواء أدوارهم ليها معني أو مكان ولا حشو.
وهجيب أحمد سعد يعمل أغنية تبقى تريند تيك توك ،
وهعمل إستايل شكل ولبس يشد البنات
وهجيب مراتي هنا الزاهد وأختها وأي حد أعرفه يمثل معايا ..
و هجيب ممثلين كوميديانات من مسرح مصر و هجيب مخرج يعملي شغل وكادرات ومدير تصوير شاطر وأصور في أماكن مختلفة مع إنتاج للسبكي حاطط فيه مبلغ حلو.

وهقول إيفيهات فيها إيحاءات سيكو سيكو عشان أشد الشباب بردو وتبقى تريند سوشيال ميديا..

وأضاف الناقد.. وفوق كله طبعا بيومي فؤاد اللي من غيره مينفعش يبقا فيلم كوميدي ، هسمي الفيلم مستر إكس ، وأهو نبقى أكننا بنقول أن ليه علاقة بأفلام بفؤاد المهندس بردو، واللي الفيلم ملوش علاقة بيهم وأحط كل العناصر دي في إعلان الفيلم عشان أشد الناس فيعني هنجح يعني هنجح ياجدعان مفهاش فصال بقى.

بس هل بقى هو نجح فعلا ؟! وهل بكل ده إنتا كده اللي شايل الفيلم أو سبب نجاحه يعني إنفصلت عن الثلاثي وبقى معاك “تساعي” ممثلين بس عامة البطولات الجماعية ، اصلا أحلي كتير للجمهور إنما يبقى الممثل فاهم الفرق بين اللي يقدر يشيل لوحده واللي لأ..

وقال الناقد مسؤول صفحة المخرج، في نقده للفيلم: الإجابة علي السؤال بتاع هل بقى بعد كل ده الفيلم نجح ولا لأ في تلت حاجات أولا أن كل العوامل دي حلوة وتنجح الأفلام بس لو حصل ايه بقي، لو في فيلم عناصره صح مش بس عوامل جذب ودعاية وخلاص..

يعني القصة وكتابة الكوميديا وبطل الفيلم نفسه، اللي هو أساس الفيلم والناس بتدخله وبتدفعله تذكرة ،،

ويضيف الناقد: أنا شايف أن الفيلم كله تقريبا نجح أنه يضحكك بس أقل واحد هيضحكك هو بطل الفيلم !؟ وأحمد فهمي اشتغل علي نفسه علي مستوي الشكل وزرع شعر وعمل بوتكس في دقنه وظيط جسمه وجيم وحركات وبقى چان وكل ده جميل وزي الفل ، وتحسه أخو تامر حسني وأحمد سعد وكريم اخوه طبعا.

بس حقيقي من غير زعل إنتا في حاجة بقت تقيلة عندك في موضوع الكوميديا ده فلو فكرت تغير و تشتغل تراجيدي أو شر أو حتي رومانسي لايت كوميدي ، اعتقد هتحقق نجاح أكبر بكتير علي المستوي الشخصي عن الكوميديا خاصة لو مش هتجيب كل فيلم ٢٠ ممثل كوميديانات.

أوس أوس و أنور وأكرم حسني أحسن تلاتة في الفيلم، وأوس أوس وأنور زي ما قلت قبل كده إتطوروا عن مسرح مصر خاصة انور وأكرم حسني ضيف شرف عامل مشهد فيه ضحك.

هنا الزاهد.. من أول ما طلعت بشوف أنها موهوبة، وعندها كتير لو ركزت علي موهبتها والتمثيل أكتر من الشكل واللبس وإنها تبقى باربي يعنى.

بس محققة اللي مطلوب منها في الفيلم ومن أحسن الناس الموجودة ،، بس تركز أنها ممكن تبقى ممثلة شاطرة مش موديل شاطرة لأنها موهوبة وعندها اللي تقدر تقدمه للأمانة يعني ،،

وأشار الناقد إلى إنه، في تلاتين ضيف شرف، مثلا كلهم جاين يجاملوا السبكي وأحمد فهمي لدرجة أن في ناس منهم تحسهم جايين فرح كده اللي هو إثبات حضور وجدعنة بس أدوارهم ملهاش معنى.

وأكد الناقد الفنى أن الفيلم قصته متناقضة ومتفهمش الكتابة، تحس فيها حاجه غلط ، اللي هو عايزين نقفل الفيلم يلا بينا بقا وفكرة أن المخرج هو المؤلف دي بشوف أنها ودت الأفلام في “داهية” في مصر لأن مهما كان المخرج شاطر إنتا بتخليه يكتب وسيناريو وحوار وإخراج فلازم يبقى عبقري يعني.

بس تمام الفيلم الكوميدي مش مطلوب يبقى دراما يعني بس لازم يضحك.
بس مش لازم الضحك يبقى بالايحاءات خاصة لما الفيلم يبقى مصنف عائلي في السينمات.

الفيلم فنيا مفهوش كلام كتير، هو الكتير اللي فيه البشر يعني اللي عايز يدخل فيلم هيصة كده وشقلبظات وأغاني وفرفشة يبقى الفيلم ده هيبقى اختيارك الأول الموسم ده.

وإختتم الناقد نقده اللافات بقوله، الخلاصة أن فيلم مستر إكس ،فيلم كوميدي فيه تنوع في الكوميديا بسبب الكوميديانات، اللي في الفيلم وقصته اعتبرها فيديو كليب واسكتشات كده بس فيه أحداث و فرفشة وأغاني وجو المصيف ، وحتي في مشاهد درامية في آخر الفيلم، فهتلاقي من كل حاجة حاجة، ودي خلطة السبكي دايما يعني بيعرف يشد الناس.

بس من وجهه نظري هو مش فيلم عائلي خاصة للأطفال يعني، وأنا علي المستوي الشخصي كوميديا الايحاءات دي مبتجيبش معايا ضحك، ولو في حد ضحكني فهما ضيوف الشرف وأوس أوس وأنور.

تقييمنا الفني للفيلم 6 من 10

تقييمنا للمشاهدين هل يشوفوه ولا لأ لو أكبر من 16 سنة هو 6 ونص من 10
لو أقل من 15 سنة 3 من 10 من وجهة نظرنا الشخصية