ما تتكسفش.. كلنا في الهوا سوا

ما تتكسفش.. كلنا في الهوا سوا

هذا المقال علشان أقولكم خففوا على نفسكم وبلاش جلد زيادة في نفسيتكم الأيام دي.

بكتب المقال دا دلوقتي علشان أقولكم كلنا في الهوا سوا..

كلنا نزلنا طبقة اجتماعية

ودا مش كلام الهزار بتاع السوشيال ميديا

لا.. فعلاً كلنا نزلنا طبقة

كلنا متأثرين أو حتى قول مضروبين.

لو اضطريت تنقل عيالك لمدرسة فلوسها أقل ماتتكسفش، علشان كلنا فكرنا فيها وفي اللي نفذ وفي اللي لسه بيعافر انه ما يغيرش.

لما تدخل السوبر ماركت واشتريت شوية حاجات، وعند الكاشير لقيت اللي اشتريته أغلى من اللي كنت عامل حسابك عليه، رجع حاجات وماتتكسفش.

ما تتكسفش تغير مقابلاتك من الكافيه لقهوة متواضعة.

ما تتكسفش انك ما اشترتش هدوم جديدة زي ما كنت متعود.

ما تتخنقش انك مش عارف تجيب لعيالك كل اللي بيطلبوه.

ما تزعلش وتاخدها على نفسيتك لو طلبت من بتاع الفراخ أجنحة بدل الفرخة الكاملة.

ما تزعلش انك بدل الكيلوات بقيت ممكن تجيب نص كيلو أو حتى بالواحدة لو متاح.

ما تتكسفش انك غيرت نوع سجايرك لنوع أرخص.

ما تتكسفش ان حد يشوفك راكب ميكروباص بدل التاكسي والأوبر.

صدقني كلنا بقينا كدا خلاص.

ما تتكسفش حتى لو مضروب أكتر من كدا.

ما تزعلش على حالك لو لغيت كل الرفاهيات ومعاها شوية من الأساسيات من حياتك.

أنا نفسي بكتب الموضوع دا علشان أقول للي حواليا ان هي دي ظروفي وامكانياتي الجديدة وما بتكسفش أقول وأعمل كدا.

أنا عارف ان اللي واجع أكتر من النزول طبقة، هو الإعلان عن نزول الطبقة.

قولها بصوت عالي وما تتكسفش.. ظروفي لا تسمح الآن.

دا مش فقر ولا ضياع.. دا تكتيك تعامل مع موقف طارئ لغاية ما يعدي.

وهيعدي، ما تفتكرش نفسك لوحدك.

والله لو فهمنا كدا ودعمنا بعض نفسياً هنتحمل الفترة دي بشكل أفضل.

ما تخليش حد يأثر عليك ويلعب في نفسيتك..

قول لنفسك دايماً انها أزمة عامة وهتعدي.

وعلى فكرة انت مش بتضحك على نفسك.. هي فعلاً هتعدي وتخلص.

دا مش توقع مني..

لا..

دي سنة الحياة.

لا في حد دايماً فوق ولا حد دايماً تحت.

الحياة زي خط رسم القلب كدا طالع نازل.. لو ثِبت فوق أو تحت معناها اننا موتنا.

لازم يفضل طالع نازل. ما ينفعش تفضل فوق ولا تفضل تحت.

هتعدي..

بس إدعم نفسيتك بنفسك.

إوعى تدوس عليها في الظرف دا علشان دا كله هيعدي هيعدي، فتطلع منه ونفسيتك سليمة مش مكسورة.. دا الأهم.

إبراهيم عكاشة يكتب: عملنا فيلم وثائقي عن كليوباترا ونمنا

إبراهيم عكاشة يكتب: الإسلامو سرسج

إبراهيم عكاشة يكتب: أساس المعركة الإعلامية مع الإخوان هي خيانتهم لهذا الوطن

امتحان إبراهيم عكاشة للصف الرابع الابتدائي

إبراهيم عكاشة يكتب: الـ BMW في مصر علامة لحاجات أعمق من مجرد عربية

إبراهيم عكاشة يكتب: البديل الخفي عليك

إبراهيم عكاشة يكتب: فين الريحة؟!

إبراهيم عكاشة يكتب: اليورو بجنيه

إبراهيم عكاشة يكتب: هبدة مرتدة

إبراهيم عكاشة يكتب: لماذا الآن شائعة الإبرة المخدرة