بيقولك مرة واحد قال للتاني أنا بتنبأ بالمستقبل..
قاله ماشي وراح رازعه بالقلم وسأله ما اتنبأتنش بالقلم دا ليه!
حاولت أخلي المقال دا كلام جد بس غصب عني لازم يقلب كوميدي.
بيقولك بقى يا سيدي ان اللي مسميين نفسهم إعلاميين الإخوان وشغالين علينا فيديوهات، بقالهم فترة كل كلامهم عن المكالمات والتحركات السرية للدولة وقيادات الدولة وبيقولوا انهم عارفين كل حاجة عن التحركات دي وعارفين الدولة بتفكر في ايه كمان!
طيب ممكن تقرا أول سطرين تاني؟
تعالى بقى أيها الكائن الإخواني..
ما بتعرفوش ليه قبل ما أهاليكم بيتقبض عليهم هنا في مصر؟
ليه بتطلعوا في فيديوهاتكم تصوتوا وتقولوا اعتقلوا أبويا وأخويا ومش عارفين مكانهم؟
بقى مخترق رئيس الجمهورية وعارف أسراره، و في نفس الوقت مش عارف أبوك فين؟
طب إزاي؟
طب إخترق كدا حتى رئيس مباحث القسم وإعرف أبوك فين.
ليه معرفتوش ان تركيا هتقفل قنواتكم بطلب من مصر (زي ماقولتوا) واتفاجئتوا لما دا حصل؟
ليه معرفتوش قبل القبض على قياداتكم هنا في مصر وحذرتوهم؟
ليه ما بتعرفوش بالتغييرات الوزارية المصرية قبل الإعلان عنها، وهي أقل في الصعوبة من مكالمات الأجهزة السرية المصرية اللي بتدعوا انكم تعرفوها؟
طيب ممكن تقولولنا في حركة محافظين ولا لا؟
ولا انتو تخصص فقط المكالمات السرية بين مصر والعالم؟
طيب ما بتعرفوش حتى الافتتاحات الرئاسية للمشروعات قبلها ليه؟
ليه كل أسراركم الخايبة عن هذه المشروعات بتقولوها بعد الإفتتاح مش قبله؟
بتتفاجئوا بيها ليه وتعملوا حلقات بعدها علشان تحاولوا تهدوها؟
ليه مش قبلها؟
ولا ما بيبقاش عندكم معلومة وبتتفرجوا زينا على الافتتاحات على التليفزيون؟
ليه مابتعرفوش الأحكام القضائية اللي بتخرج ضدكم وضد قيادتكم قبل ما يتم الإعلان عنها؟
ليه ما بتعرفوش مين اللي هيتم الإفراج عنه بعفو رئاسي؟
ليه لما الرئيس السيسي دعا مجلس النواب لجلسة طارئة، ليه ماعرفتوش انها كانت بسبب تغيير وزاري وانتظرتوا أمام التليفزيون زينا؟
ليه ما بتعرفوش ان الرئيس مسافر لأي مكان قبل الإعلان الرسمي؟
بصراحة أنا شايف ان كل المعلومات دي بسيطة بالنسبة للتحركات السرية للدولة اللي بتدعوا انكم تعرفوها.. مش بتعرفوها ليه؟
بتعرفوا التحركات السرية وانتو مش عارفين العلنية؟ (ضحكات شريرة متقطعة).
على الجانب الآخر بقى..
قولتوا على قناة السويس وهي بتتحفر، انها هتغرق..
قولتوا الدولار هيبقى ب150 جنيه..
قولتوا العاصمة الإدارية فنكوش..
كان نفسي أدخل أجيبلكم سطر الجلاليب من جوة..
بس للأسف المقال مش هيكفي الجلاليب بتاعتكم.
ومفيش داعي أصلاً أكررها لان الناس عارفاها.
خلصت قراءة؟
إقرا أول سطرين للمرة التالتة وإضحك.
