من ٤ سنين كنت بكلم انا وأحد أصدقائي عن المجال الإعلامي
وكنا بنكلم عن المؤثرين منهم في الشارع واللي كلمته مسموعة
ولو كح تلاقي كلمة “سلامتك” بتهز الشارع
“مش هذكر أسماء”
انما ساعتها جبنا اسم اسم وقعدنا نفند معطيات وطلبات الجمهور المصري،
انا فاكر ساعتها غلطه وقولتله الآتي:
بص هبسطلك وجهة نظري، عندك بضاعة وهي أهم سلعة في الدولة لا تقل أبدا عن السلاح أو القمح
سعادتك عايز توصل السلعة دي للجمهور، وركز معايا..
عايز توصلها “بأسرع وقت وبأبسط وأسهل طريقة”
فبتجيب عربيات نقل وتشيلها الحمولة وينطلقوا كل واحد في طريقه
قلتله ساعتها:
كل اللي عالساحة دول عربيات نقل متوسطة ومنهم عربيات نقل صغيرة كل عربية فيهم بتحاول وتجتهد بطريقتها عشان توصل الحموله زي مانت طلبت باسرع وقت واسهل طريق
في منهم بقى اللي بيجود فالبضاعة مبتوصلش اصلا،
ومنهم اللي البضاعة بتفسد منه لأنه بياخد طريق طويل اوي،
ومنهم اللي بيوصل ربع البضاعة لأنه وقع تلاتربعها في الطريق اللي سلكه
بس استن..
عندك بقى مقطورة واحدة بس هي المقطورة الوحيدة اللي بتاخد أكبر كمية بضاعة وبتوصلها بأسرع وقت وبأسهل طريقة
قمت انت بقى عملت ايه؟
سبت المقطورة حد غيرك يشتريها
وبقت بتوصل بضاعة منافسة ليك وانت مش ملاحق اصلا على منافستها
مع انك عندك عربيات نقل كتير جدا بس كلهم للاسف حمولتهم عالقد
ومش بس كده ده انت حتى عربيات النقل الكبيرة شوية ركنتها وفكيتها بعربيات نقل صغيرة مالهاش أي تأثير عالجمهور، اقصد مش قادرة اصلا عالحمولة بتاعتك.
والنهاردة اسمحلي اقولك يافندم وبعد اربع سنين اقدر اقولك ان المقطورة زي ماهي وانت بقيت زي مانت برضه
لا عارف تنافس ولا تأثر ولا توصل أي حاجة لأي حد،
هل حضرتك مش معاك تمن انك تشتري ١٠ مقطورات؟
طب ولما حضرتك قادر مستني ايه؟!
البضاعة فسدت يافندم وانتهت، والناس كمان جالها تسمم ومش لاقيه حد يسعفها غير المقطورة الوحيدة اللي بقت بتحمل بضاعة مسمومة ومسرطنة.
هل تسمعني!؟
