في البداية أنا آسف على العنوان العنيف.. بس يبدو أن أحياناً العلاج بالصدمة يُفيد.
ماذا يحدث في المجتمع المصري؟
حوادث قتل نوعية خاصة للفتيات، فتاوى غريبة، إعلام يهتم بكل ما هو مستفز والتريند يحكم، أناس كنا نظنها شخصيات مجتمع، نسمع منهم كلام عجيب، ومؤسسات دينية تدور في فلك التريندات!
ماذا يحدث؟
ألا يوجد بينكم رجل رشيد؟!
ألا يوجد كبير للمجتمع؟!
نقلب عامية بقى..
في ايه يا جماعة؟!
دا لا إعلام ولا صحافة ولا دين ولا آراء ولا أي حاجة محترمة! دي مهزلة عايشينها كل يوم.
يعني بدل ما يتدخل الناس اللي نحسبهم كبار علشان يوقفوا الهبل والكلام المريب، نتفاجئ انهم بيعلقوا عليه وداخلين ياخدوا اللقطة والتريند؟!
يعني زوجة ايه اللي ما تخدمش جوزها وزوج ايه اللي ما يساعدش مراته؟!
انتو متجوزين تنتقموا من بعض؟!
طيب إحنا مالنا بأمراضكم النفسية دي؟!
دي أمراض نفسية مش دين ولا آراء.
وكل ما تتقتل بنت نلاقي ناس بتدافع عن القاتل؟!
حتى اللي المفروض يقوّموا المجتمع اللي هما المفروض مشايخ، نتفاجئ انهم بيمارسوا ذكورتهم الكدابة مش داخلين يهدوا الناس أو يفيدوها بحاجة؟!
أما بقى الإعلام فحدث ولا حرج.. بدل ما يشوفولنا حل بنلاقيهم معانا في الصف بيتفرجوا ويركبوا التريند وينفردوا بأهل الضحية وصحابها وأول صورة لغرفة نومها وأول صورة لبياع الكشك اللي كانت بتشتري منه؟!
فين حلولكم؟!
يا راجل دا لما شوية عيال حدفوا القطر بالطوب، عملوا تقارير عن اصابات القطر!!
انت متخيل التفكير؟!
نسيوا يعملوا حلقة عن الأسباب المجتمعية العميقة للموضوع ويطرحوا حلول.
ولا دي حاجة مش هتجيب اعلانات؟!
هو مش انتو دوركم تقوّموا المجتمع ولا دوركم تعلوا مشاهدات واعلانات وخلاص؟!
جيوبكم مابتشبعتش فلوس إعلانات؟!
فين المجلس الأعلى لتنظيم الإعلام؟!
هو محدش بينقاش مشاكل المجتمع ليه ويقترح حلول؟!
ليه كل بيركب تريند بس؟!
الأغرب من كل دا هو سكوت الدولة على الخراب المستعجل للمجتمع!
بنشتغل فقط على علاج الأعراض مش علاج الأمراض نفسها.. يعني واحد قتل نعدمه.. تمام طبعا دا إنفاذ للقانون..
بس دا علاج العَرَض، فين بقى علاج المرض؟!
دا علاج للكحة..
فين بقى علاج سبب الكحة اللي هتطلع إلتهاب رئوي.
عايزين اقتراحات لعلاج الأمراض نفسها؟
حاضر
نسف الخطاب الديني مش تطويره.. نبتدي على نضافة بقى.. غربلوا الناس اللي بتكلم الشعب على منابر الجمعة، والقنوات الفضائية، ومشايخ اليوتيوب.
ومحدش يقولي ما وزارة الأوقاف مسيطرة وعاملة خطبة جمعة موحدة!!
لا يا سيدي الفاضل، أعرف مساجد بيطلع يخطب فيها ناس دفعوا فلوس، ومساجد أئمتها بيصحوا العصر والمواطن اللي بيروح بدري بيخطب بدل إمام الأوقاف.
ندخل بقى على الكارثة الأكبر..
الإعلام..
نسف المواقع الإخبارية والقنوات الفضائية وغربلة من يعمل بهما وفحص توجهاته ودرجة وعيه بمشكلات المجتمع.. دي حاجة سهلة خالص.. أدخل على صفحته على الفيس بوك هتعرف بيفكر أزاي وتوجهاته ايه.
اللي تلاقيه تافه أو توجهاته مريبة يروح في الغربال.
