بناء الوعي المصري أمر حتمي لبناء الدولة الحديثة

كتب: أحمد علي.

مع كل خبر عن مشروع أو إفتتاحه أو إتفاقية لتصنيع شئ معين في مصر تلاقي كم أسئلة غريبة وبتدل على عدم الفهم وقلة الوعي.

زي مثلاً، خبر عن زيادة رسوم عبور السفن لقناة السويس، تلاقي ناس تقول فين أرباحنا من الزيادة دي؟… وناس تانية تقول حسبي الله…! دا بجد يعني؟ أصل مش معقول يكون العقل متدني بالشكل دا.

كذلك عن أي خبر بخصوص الإحتياطي ولا عن فائض الموازنة ولا عن نسبة النمو، تلاقي برضو ناس بتسأل فين التوزيع العادل للثروات؟؟ فين نصيبنا من الفلوس دي؟…!، دي عينة من كم الأسئلة اللي بنفس النمط دا.

والرد على كل دا كالأتي:

زيادة رسوم عبور قناة السويس مش معناه إن الزيادة دي هتتوزع عليك كمواطن على هيئة فلوس، الزيادة دي سببها التضخم، وإرتفاع أسعار الوقود، وإرتفاع أسعار الخدمات والصيانة.. وإلخ من الخدمات اللي بتقدمها هيئة قناة السويس للسفن العابرة، فـ الزيادة دي بتروح لسد الفجوة اللي بين الخدمات المقدمة وبين ميزانية القناة لتطويرها أكتر وصرف مرتبات اللي شغالين فيها… يعني مش لازم تعود على شخصك مادياً.

الحاجة التانية هي إن أي فائض في الموازنة أو أي زيادة في قيمة الصادرات دي طبيعي هتتوزع على قطاعات الدولة المختلفة، صحة، تعليم، مشروعات تانية، دعم سلع، بالإضافة إن شركات التصدير الخاصة فلوس التصدير بتكون ليها هي مش للدولة، ف شئ بديهي طبيعي ميعدش عليك شئ مادياً..

لازم تفهم أن نسب النمو والفائض بيتم توزيعه وصرفه عليك بشكل غير مباشر، عن طريق الدعم وعن طريق تحسين مستوى الخدمات المقدمة ليك من خلال تحديث المرافق العامة، والبنى التحتية اللي حضرتك بتستعملها، ومن خلال توفير السلع الأساسية وتأمين إحتياطي غذائي يكفي شعب تعداده 110 مليون وأكتر، أنت مش عايش لوحدك، والأمور مش بتمشي كدا، إذا كنت أنت شايف مشهد فـ اللي بيحكم شايف الفيلم كله وفاهم التحديات والظروف اللي أنت مش شايفها.

الدولة مش بتسرقك ولا بتاكل حقك، بس مش كل جنية تكسبه الدولة توزعه عليك في هيئة فلوس، لازم نرتقي شوية.

الحقيقة دا بينُم عن جهل مُدقع بالأمور البديهية اللي المفروض شعب شايف الدولة بتتبني من أول وجديد من الألف للياء، بالإضافة للأزمات الدولية اللي أنت كمواطن بتتكلم عنها وعارفها بس مش عايز تعترف بتداعياتها على بلدك، وكإننا في عالم غير العالم اللي هما فيه.

الناس معذور جهلها صحيح بس مش كدا،(أليس فيكم رجل رشيد)؟

الدولة بتتبني لينا وللأجيال القادمة، غصب عننا لازم نتحمل تكلفة فساد وركود 40 سنة عدت.. زي ما أهالينا ضغطوا نفسهم وأتحملوا وصبروا وإستلفوا عشان يبنولنا بيت نسكن فيه وإحنا طلعنا لقيناه جاهز ومبني، لازم إحنا كمان نستلم الراية ونبني البيت من تاني لغيرنا… هي الدنيا كدا.

الوعي أمن قومي، الوعي لازم ينتشر بين الكل، لازم العقل الجمعي المصري يفهم كدا، عشان تبني بيت لازم تأسسه صح الأول قواعد وأعمدة بتخطيط هندسي، مينفعش أرص طوب وخلاص، مع أقل عاصفة تذره الرياح.

وعيكم يرحمكم الله…!