خراب عقلي (2)

برضو مفيش فايدة.. آجي أنام عقلي يدور في حاجات عجيبة..

بعاني بجد إني طول ما أنا ماشي في الشارع عقلي بيسجل كل حاجة من ورايا وبيشتغلني بيها بالليل وأنا بحاول أنام..

جربت أشتغله أنا وأعمل مش فاهم هو بيسأل عن إيه، لكن طلع لئيم وفاهمني.. معايا من زمان بقى.

إمبارح حد كان مستنيني في شارع وعمال يوصفلي ويقولي أنه أمام المركز الألماني لصيانة السيارات..

أنا بطيبتي عمال أدور على المركز الألماني لصيانة السيارات دا..

بس بدور بالصورة الذهنية المنطقية المخزنة في عقلي لحاجة ينفع تحمل اسم المركز الألماني لصيانة السيارات..

عقلي المنطقي الله يسامحه مسجل الصورة الذهنية لاسم فخم زي كدا على أنه مركز كبير في مبنى ضخم وحاجة آخر فخفخة.

وبناءًا عليه عقلي سايقني بدور على صورة مماثلة للي هو مقتنع بيها..

المهم يمين شمال فوق تحت شرق غرب وصلت لصديقي وأكتشف إني عديت من أمام المكان دا من شوية وعقلي نفضله!

طلع ورشة مترين في متر في بيت قديم وحاطط يافطة صغيرة مكتوب عليها فعلاً المركز الألماني لصيانة السيارات!

قلت لعقلي ما أهو يا عم الناصح.. أُمال بتتجاهله ليه!

أحرجني بصراحة..

قالي بذمتك دا مركز ألماني؟!

معرفتش أرد عليه.. عنده حق بصراحة.. هو صح.

مش يفوت بقى الموقف ويسكت؟!

لا ازاي؟!

قبل ما أنام لقيت عقلي جايبلي المشهد دا تاني وبيقولي يعني ماردتش عليا، بذمتك دا كان مركز ألماني؟!

يا عم انت عايز إيه مني ما خلاص إعترفتلك إنك صح!

راح معاقبني بقى وجايبلي حاجات شبيهة..

فكرني بالكشك اللي كاتب ميني ماركت..

وبالدكان اللي كاتب سوبر ماركت..

وبالسباك اللي كاتب المركز الإيطالي..

وبمعرض السيارات أبو عربيتين خردة وحاطط صورة عربية فيراري وكاتب أحدث السيارات العالمية..

ودكان ساعاتي كاتب المركز السويسري..

وبمحل البطاطين اللي كاتب أنه مول..

وبحمادة فيشة اللي كاتب المؤسسة الاوروبية للكهرباء الحديثة..

وبشقة في الطالبية بتدي كورسات وكاتب يافطة عليها الأكاديمية الامريكية بالتعاون مع جامعة كامبريدج..

والدكتور اللي في حارة وزميل جامعة كاليفورنيا..

وعملاق اللغة العربية اللي كاتب إعلانه غلط على ورقة الإعلان ومش عارف الفرق بين الهاء والتاء المربوطة.

والمؤسسة المصرية للبناء الحديث، اللي أجّرت منها شنيور للنجار اللي جبته من محل كاتب المجموعة الأمريكية للديكور، علشان يفتحلي باب الشقة لما المفتاح ضاع.

خلاص يا استاذ عقلي كفاية أبوس إيدك.

لا أنا بس بعرفك انكم مخترعين لنفسكم عالم وهمي وعايشين فيه ومفكرين نفسكم ناصحين وإن في حد بياكل من الكلام دا.

طيب خلاص أنا اسف.. ممكن تسيبني أنام بقى؟!

مش قبل ما أعرفك انكم بتشتغلوا بعض!

عند حق

إقتنعت يعني؟

اه والنعمة

كان نفسي أحكيلك بتشتغلوا بعض في ايه كمان وبتقعدوا جنب بعض تشتكوا.

أبوس خلاياك كفاية.

طب إطفي بقى المنبه اللي هيرن حالاً دا، وقوم شوف اللي وراك ومستنيك بالليل أكمل عليك لغاية ما اجننك.