نسرين طارق تكتب: شمع الفتلة و هرب
مرة ملك من الملوك قبض على واحد نصاب ومحتال.. وأغلب الشعب بيشتكى منه.
دار الحوار ده بين الملك والنصاب..
الملك: ازاي بتقدر تنصب على الناس بمنتهى البساطة؟
النصاب: بالخبرة والذكاء.
الملك: عايزك تنصب، وتحتال قدامي حالاً.
النصاب: لازم عدة الشغل (بكرة خيط قطن و شمع)
الملك: أمر الحاشية يجيبوا له العدة.
وطبعا نفذوا الأمر.. وجابوا بكرة الخيط والشمع.
النصاب: أول خطوة في النصب.. لازم نشمع الخيط. وطلب من الملك يمسك طرف الخيط، وهو بيفك البكرة ويشمع الخيط.. و خرج من قاعة الملك، ومشى في طرقات القصر، وهو بيفك ويشمع الخيط.. خرج من القصر ومشى في الشارع، وهو يشمع الخيط.. كمل مشي لحد ما وصل لمكان مفيش حد فيه.. رمى الخيط وهرب.
أما الملك زي ماهو على وضعه ماسك طرف الخيط ومستني..
في النهاية وبعد انتظار طويل الملك سأل هو النصاب راح فين؟
الكل جاوب: شمّع الخيط وهرب
وده بالضبط الى بيحصل معانا.. النصابين هما الإعلاميين اللي بيشمعوا الفتلة طول الوقت في حلقاتهم.. واحنا ماسكين طرف الخيط من الناحية التانية ومستنينهم يعرفونا إيه إللي بيحصل، أو يفهمونا الدنيا ماشية ازاى.. أو إيه حال البلد.. أو حتى يعرضوا المشاكل اللي تهم الناس بجد وبتعبر عنهم.
وقت المركب ما هتغرق بسببهم.. هيسيبوا طرف الخيط ويهربوا.
عرفنا حكاية الملك، وازاي النصاب ضحك عليه.. ياريت نتعلم ومنديش فرصة لنصاب يمسكنا طرف الخيط ونقف نتفرج لحد ما يهرب.
ليه اقرأ اخبار تافهة ومش بتعبر عني.. ليه أضيع وقتي وأسمع إعلامي كدب عليا بدل المرة عشرة..
النصاب شوه وعي جيل كامل.. جرف قوى ناعمة واختزلها في فستان وجواز وطلاق.. وحوادث قتل فردية بتحصل في كل دول العالم يوميا.
الحل في ايدينا منمسكش طرف الخيط.. اي معلومة أو خبر نسمعه.. ندور ونتأكد أنه صح.. ويهمنا ويعبر عننا.. وعن مشاكلنا وشواغلنا.
