د. تامر حسن يكتب: كلمتين مهمين عن القلب وأزماته
مبدئيا، الأزمات القلبية سببها إن الدم اللي بيروح عضلة القلب بيقل، وعضلة القلب محتاجة الدم عشان يوصلها الأكسجين اللي بتحتاجه عشان تتنفس وتاخد الطاقة وتشتغل.
يعني كل الدم اللي داخل طالع من القلب ده مش مكفي العضلة ازاي؟
لا يا سيدي الدم اللي بتحتاجه العضلة ملهوش علاقة بالدم اللي بيوزعه القلب عالجسم، بائع الحلوى مش بيتغذى عالحلوى اللي بيبيعها، وصلت الفكرة؟
بإختصار، الدم اللي بتعوزه عضلة القلب بيوصلها عن طريق حاجة اسمها الشرايين التاجية، بيتقسموا واحد أيمن له تفريعتين وواحد أيسر له ٤ تفريعات عشان يعملوا شبكة توصيل دم لعضلة القلب، كل تفريعة بتغذي جزء معين في العضلة.
أي ضيق أو انسداد في أي واحد من التفريعات دي، أو نقص في الأكسجين أو كمية الدم اللي بتوصلهم زي في أمراض ضغط الدم والرئة كده، هيخلي الجزء اللي بيغذيه مش هاينقبض زي باقي أجزاء القلب، ونبدأ نحس بأعراض الازمة القلبية.
طب ايه بقا الأعراض اللي تخليني انتبه إن دي ممكن تكون أزمة قلبية؟ ولا هي بتيجي فجأة كده من غير انذار؟
نسبة الأزمات القلبية اللي بتيجي بدون سابق إنذار بفضل الله قليلة جدا، معظم الأزمات القلبية بتيجي بأعراض لازم ننتبه ليها كويس لو حصلت خصوصا لو كان الشخص من المجموعات عالية الخطورة المعرضة للأزمات القلبية.
المجموعات دي هي:
-مرضى الضغط والسكر والقلب المزمنين
-مرضى الرئة والمدخنين
-مرضى الكوليسترول والسمنة المفرطة
-مرضى تجلط الدم
-الناس العصبية بزيادة خصوصا لو مش بيمارسوا أي رياضة بدنية
-الناس اللي فيه في أسرتهم ناس أصيبوا بأمراض قلب عشان العامل الوراثي
-وطبعا كبار السن
لو أنت من المجموعات دي، فخلي بالك بقى من الأعراض التالية:
-ألم في وسط الصدر، أو الكتف الأيسر، أو فم المعدة.
-ضيق في التنفس وغثيان وممكن توصل للقيء.
– فرط العرق والشحوب ودي مهمة جدا جدا.
– دوخة مفاجئة أو اغماء.
مجرد ما تحصل أي حاجة من الأعراض دي وانت من المجموعات عالية الخطورة لازم تشتبه في حدوث أزمة قلبية وتطلع جري عالمستشفى، ودايما تخلي عندك اسبرين أطفال بجرعة “٧٥ مل” وتاخد ٤ اقراص تقرقشهم فوراً لحد ماتوصل المستشفى لإستكمال التشخيص والعلاج.
طب نحمي نفسنا ازاي من الأزمات القلبية؟
شايف كل الاسباب اللي فوق دي في المجموعات عالية الخطورة؟ اعمل عكسها، كده بالبساطة دي.
يعني علاج الضغط والسكر والقلب المزمن بتاعك يتاخد بإنتظام، قلل الدهون والأكل اللي من بره البيت ولو الكوليسترول عالي عندك لازم تعالجه، التدخين يتوقف، لازم تمارس أي مجهود بدني يومي منتظم انشالله تمشي لمدة نص ساعة مش لازم جيم واشتراكات نوادي، أشرب مياه كتير عشان تحافظ على سيولة دمك وانتظام دورتك الدموية، وأخيرا ماتسيبش نفسك للمبالغة في العصبية والانفعال والاكتئاب حاول تبقى أهدى وأعقل في الحزن والفرح.
الأزمات القلبية بتبقى قاتلة عشان مش بننتبه ليها من بدري، لو انتبهنا ونبهنا الناس ممكن ننقذ أرواح كتير ونلحق الأزمة في أولها وتعدي بسلام، نتمنى لقلوبكم جميعا السلامة والفرحة والسعادة.
