كتبت: نسرين طارق
لو تخيلنا إن الزيادة السكانية أو عدد الأطفال إلى بيزيدوا كل يوم عبارة عن حنفية بتنزل ميه في شقة سكنية.. تخيل معايا الحنفية بتنزل ميه بغزارة وبسرعة رهيبة، والصرف مش مجهز لكمية الميه دي.. تفتكر هنحتاج وقت ومجهود أد ايه عشان تنضف الشقة وترجعها لطبيعتها عشان نقدر نعيش فيها.
الأفراد المسؤولين في الاسرة بيحاولوا يتخلصوا من الميه بطرق كتيرة.. لكن محدش بيحاول يقفل الحنفية.
هو ده الى بيحصل في ملف الزيادة السكانية.. الحكومة طول الوقت بتحاول تنشف الميه أقصد تعالج آثار المشكلة مش المشكلة نفسها.
الحكومة بتحاول تعمل طرق لتقليل الكثافات المرورية واستيعاب السيارات إلى بتزيد كل سنة، وتبني مساكن لمحدودي ومتوسطي الدخل، وبتنقل الناس من الأماكن العشوائية لمساكن آدمية، وبتعمل مشروعات قومية لاستيعاب عدد أكبر من العمال.. الحلول كلها كويسة لكن للأسف ليست على مستوى الحدث أو المشكلة.
الحكومة طول الوقت بتعالج الآثار وسايبة الحنفية مفتوحة من غير تقنين ولا معالجة صحيحة.
العيل بيجي برزقه.. موافقين على الكلام مفيش مشكلة.. العيل بيجي معاه مدرسة يتعلم فيها ومستشفي يتعالج فيها؟
ليه أصحاب النظرية دي بيطالبوا الحكومة برزق عيالهم؟
مشكلة الزيادة السكانية مش اختراع مصري حصري، مشكلة موجودة في دول كتير في العالم.. الصين والهند وغيرهم.
بعض الدول عرفت تحل المشكلة من زمان وتسيطر على الزيادة السكانية قبل ما تقضي على الأخضر واليابس.
هل صعب علينا نجيب كتالوج حل المشكلة ونطبقه عندنا؟
اقفلوا الحنفية بالقوانين.. احنا شعب مش بنسمع الكلام الإ لما نتعاقب!!
