أسطورة جملة “إدونا مرتبات زي برة”.
بص يا سيدي الكريم..
أكبر غلطة سيادتك بترتكبها بالجملة دي، انك بتحسب مرتب برة يساوي كام مصري، فبتنبهر وبتنسى تحسب مثلاً السكن برة بكام بالمصري برضو.
وبتنسى تحسب شوية حاجات تانية بالمصري.. بكام ضرايب برة، بكام أكل برة، بكام سلع برة، بكام ملابس برة، بكام خدمات برة، بكام فيزيتا دكتور برة، بكام فلوس مدارس برة، وبكام مخالفات برة، الخ.
برة ممكن تقبض ١٠ آلاف يورو.. جميل جدًا رائع..
بس على طول أهلك وحبايبك بيشغلوا الآلة الحاسبة ويضربوا ويجمعوا ويطلعوا بنتيجة ان “يا لهوي بيقبض برة بتاع ٢٥٠ ألف جنيه في الشهر”!!!
أه بتقبض ٢٥٠ ألف جنيه ف الشهر.
بتدفع أكتر من ربعهم ضرايب (أو تِلتهم وبلاد تانية أكثر من النصف زي فنلندا واليابان مثلاً).. الربع التاني بتدفعه سكن وخدماته.. النص اللي فاضل بتكافح بيه بالعافية علشان تغطي أكلك وشربك وبنزينك ومدرسة الواد وبتكمل بقروض.
انت بقى سعادتك هنا ليه بتبص فقط الخواجة بيقبض كام؟!! ما تكمل “وأنتم سكارى”، وبلاش تقف عند “ولا تقربوا الصلاة”، علشان المعنى يكمل بشكل صحيح.
اللي عايز مرتب برة، أوي أوي.. مفيش مشكلة.. وإدفع منه المطلوب منك زي برة برضو.
في مرة من كام سنة كدا كنت بتكلم مع صديق فكان بيحكيلي لما كان ف ألمانيا وسنانه تعبته وراح لدكتور الأسنان دفع الفيزيتا ٢٠٠ يورو (وكان بيكمل كلامه معايا عادي)، بس أنا وقفته عن الكلام وسألته منزعجًا “يالهوي ٢٠٠ يورو يعني ٤ الاف جنيه كشف بس”!!!
بصلي بكل استهزاء وقالي يابني ٢٠٠ يورو في بلدها زي ٢٠٠ جنيه هنا، انت هتعمل زي اللامؤاخذة اللي بيقعدوا يحولوا فروق العملات كل ما يسمعوا رقم!!، انتو مين فهمكم ان اليورو برة يعني ٢٠ جنيه فكدا يجيب حاجة هناك؟! اليورو برة يعني جنيه.. وايجار الشقة اللي بألفين يورو هناك يعني بألفين جنيه هناك.. لما تنزل مصر باليورو دا إبقى إجمع واضرب هنا براحتك.
الحقيقة كنت أول مرة آخد بالي من الحكاية دي.
من ساعتها بقيت عاقل وبقعد وسط الناس أقول كلام بني أدمين. بصراحة قبل الموقف دا، كنت أي حد أعرفه شغال برة وأعرف مرتبه، كنت بضربه في سعر العملة دي هنا. لغاية ما فهمت إن أي عملة على أرضها بتساوي (١) فقط، والـ (١) دا هو بيتحدد له عليه ضرايبه وإلتزاماته وأسعار السلع والحياة في البلد دي، مش على الـ (١) بتاع بلد تانية.
المرة الجاية هكتب لك عن دفعك برة لتمن استهلاكك للمواصلات العامة والأسفلت..
مش تمن المواصلات!
ركز..
تمن استهلاكك للمواصلات.. غير دفعك تمن المواصلة.
