إبراهيم عكاشة يكتب: لماذا الآن شائعة الإبرة المخدرة

كتب: إبراهيم عكاشة

المقال للسيساوية فقط.. أصحاب اللية يمتنعون علشان مش هيفهموا حاجة.

هدخل في الموضوع على طول علشان مش محتاج أشرحلكم ان الجماعة الإرهابية لازم كل فترة تلعب في موضوع تخوف بيه الناس.

هتقولي وهما مستفيدين إيه مش كل حاجة تقولوا الإخوان!

هقولك وهل في مستفيد غيرهم من قلق الناس؟

هو مش في مبدأ منطقي اسمه إبحث عن المستفيد؟

مين هيستفيد من شائعة زي دي غيرهم؟

الدولة ولا الأمن ولا الشعب؟

أعتقد يعني بنص تفكير هتعرف ان مفيش مستفيد غيرهم.

هتقولي هيستفيدوا إيه من قلق الناس؟

أيوة كدا انت ابتديت تسأل صح.. تعالى بقى..

حضرتك راجل “سيساوي” ومحب لبلدك وللجيش..

بس سكة ودوغري أكيد بتحب عيالك أكتر..

طيب أنا واحد عايز أهز فيك ثقتك في السيسي.. أعمل إيه؟

ألعب معاك في حتة السيسي غرق البلد؟ هتعرف ترد عليا.

ألعب معاك في حتة هو احنا هناكل طرق وكباري؟ هتعرف ترد عليا.

ألعب معاك في حتة دا الإقتصاد بينهار؟ هتعرف ترد عليا.

ما انت راجل سيساوي ومتابع وفاهم وعارف كل الألاعيب دي..

يعني محصن ضد الاختراق الخرفاني

بس لما أجيلك من ناحية أمان عيالك في الشارع، ممكن أقدر أفتح في تحصيناتك ثغرة..

ثغرة الخوف على عيالك اللي كلنا بنضعف أمامها.. وهدم الجدار الخرساني بتاع يحتاج فقط لثغرة ثم تتوالى الضربات البسيطة حتى ينهار الجدار.

لعب العواطف والصعبانيات التي يجيدها الاخوان

طيب إيه هي الضربات دي؟

المتوالية

ألعب معاك المتوالية..

طالما نفدت في الجدار بتاعك يبقى أنتقل للمرحلة التانية..

أبتدي معاك “البلد ما بقتش أمان مع السيسي”

أهلاً بيك كدا بدأنا الشغل المستهدف أصلاً من ورا الشائعة دي.

ثم أنتقل بيك لمرحلة السيسي لازم يمشي علشان البلد ترجع أمان.

هتقولي بس أنا مش عايز دا، أنا بس خايف على ولادي!

أقولك المدمنين ابتدوا بخطوة أنا هجرب وآخد فكرة بس

الخطوات اللي بعد ما خد فكرة هو ما حضرهاش.. حكوا له عنها في المصحة وهو مدمن بيتعالج.

المطلوب من الشائعة دي الآن فتح ثغرة معاك فقط.. لغاية ما توصل بالسلامة للمصحة من غير ما تعرف.

لحد هنا وكنت بتكلم معاك منطق..

نتكلم عِلم بقى..

مفيش في الكوكب كله إبرة تاخدها تكومك أو منديل تشمه يوقعك..

دا كلام أفلام علشان المخرج مش هيقعد بيك على الشاشة نص ساعة لغاية ما الممثل ينام من الإبرة، فبينجزلك.. دا غير انه ماعندوش حلول علمية سريعة غير أنه يخطفلك الممثل في ثانية بإبرة ولا منديل وهو عارف ان مش هيهرشها غير الأطباء، ودكتورين تلاتة هيعلقوا وهتعدي بسلام الله مع باقي الشعب الغلبان.

دا حتى يا جدع لما بتبقى تعبان وبتاخد حقنة مسكنة، الدكتور بيطمنك ان مفعولها هيبتدي كمان نص ساعة وهترتاح!

الله.. يعني الحقن بتاخد ع الأقل نص ساعة على ما تشتغل؟!

اه والله

دا غير كمان ان الدكتور بيهبدك الحقنة وتقعد تصوت على الأقل 10 ثواني والإبرة جواك لغاية ما يفضي فيك الجرعة.

في الآخر انت عايز تتشك إبرة لطش على السريع وتنام فورا في مكانك؟!

بالله عليك لو توصلت للاختراع دا هاتهولي ونروح نبيعه سوا لمستشفيات أوروبا والدول المتقدمة.

آخر نقطة بقى بتاعة تجارة الأعضاء..

مين قالك ان اعضاءك تجيب فلوس؟َ

دي ما تنفعش أصلا يا استاذ.

دا توافق أنسجة وفحوصات وتحاليل 3 شهور وليلة كبيرة أوي سعادتك، وكل دا على أساس انك سليم أصلاً.

ولو هما مستهدفينك فعلا لسرقة أعضائك دا معناه انهم حللوا لك 3 شهور وانت ماتعرفش واتأكدوا انك تنفع فيقطعوك من هنا ينقلوا اعضائك للمريض من هنا، لان حضرتك هتحمض منهم بعد 12 ساعة بالكتير.

هياخدوك ولا ياخدوا حد من عندك يعملوا بيه إيه؟!

قوم يا استاذ قومي يا مدام شوفوا اللي وراك ربنا يهديكم وياخد الاخوان.

أقوم أنام أنا بقى وأستمتع بأجازتي اللي خدتها علشان خايف أنزل لا ألاقي أعضائي معروضة على أمازون، رئة طازة بشعب هوائية سالكة إستعمال خفيف.