يوستينا نبيل تكتب: بتعرف تتخانق؟!
تعرف انك ممكن توصل مشاعر الغضب للي قدامك بدون ما تتخانقوا،عادي!
هو يبان كلام نظري وعملياً صعب تحقيقه، لكن مش مستحيل.
بدليل انه فيه ناس قدروا ينجحوا في ده، وهقولك ازاي قدروا ينجحوا، لما طبقوا الكلام اللي جاي ده وجربوه اكتر من مره لحد ما عقلهم اتبرمج عليه وبقى دا العادي بتاعهم.
خلينا الاول نقول ليه بنتخانق !؟
هل انت بتكون قاصد تضايق شخص بتحبه ويهمك ؟! الاجابه قطعاً لأ، بس اللي بيحصل غير كده، بنضايق اللي بنحبهم خصوصاً واحنا متضايقين، ودا عشان حاجه واحده بس “اننا معرفناش ازاي نقول اننا متضايقين”.
طب ازاي نوصل رسالتنا من غير ما نضايق اللي بنحبهم لما تيجي تتكلم عن حاجه مضايقاك؟
كتير بنعتبر الحاجه دي هي الشخص اللي قدامي فبتكلمه ان هو السبب في شعورك ده، وبالتالي بيبدأ يدافع عن نفسه فتقلب خناقه، بس الحقيقه هي ان التصرف اللي عمله هو اللي سبب الشعورده، والحقيقه ان الشخص اللي انت بتحبه وهو بيحبك انتوا على نفس الجهة سوا مش ضد بعض وقت الاختلاف ، ويمكن تكون محتاج توضح ده وانت بتتكلم معاه، فببساطة وفي خطوات قليله، بس مش هكدب عليكم واقول سهلة، بس محتاج تدرب عليها:
١-انت محتاج تقول للشخص اللي قدامك، ايه اللي حصل – تشرحله الموقف -.
٢- اوصف اللي نتج عن تصرف الشخص في الموقف من آثار سلبية.
٣- تبدأ تتكلم عن “الشعور” اللي حسيت بيه نتيجه للتصرف أو الموقف اللي حصل.
٤- اسمع، اسمع من غير احكام، اسمع بحياديه، وحط في بالك ان الشخص التاني كمان محتاج يعبر عن نفسه لأنه اكيد عنده مشاعر تجاه الموقف ومن حقه يتسمع.
والعمليه دي ممكن تتعاد ألف مره لحد ما توصلوا انتوا الاتنين لحل يناسبكم، ويرضيكم تماما، عرفت هتعمل ايه في خناقتك اللي جايه ؟!
