يوستينا نبيل تكتب: بتعرف تنشن على هدفك؟
في يوم نزلت مع بنتي نشتري لعبه كان من ضمن اللعب لعبة التنشين “Darts” وقتها قالتلي دي لعبه صعبة ومش هعرف العبها، وقتها قولتلها براحتك اختاري اللعبه اللي تحبي تلعبيها.
عدى وقت ولقت اللعبه موجودة عند جدتها قررت تجربها، في الاول كانت بتجيب السهم برة الدايرة خالص، بعدها بقى السهم بيشبك أي حاجه جوه الدايره وبقت تقولي انا عايزه رقم ٢٠ مش عايز يجي عنده،
قولتلها: خلينا نجرب تبقى عينك مش شايفه غير بس الرقم اللي انتي عايزاه.. وفعلاً بدأ السهم يجي قريب جداً من الرقم اللي عينها عليه.
ومن الحكاية دي خلينا نتكلم عن بحث اتعمل آخر التمانينات أثبت أن الناس اللي بتحط هدف، ١٠٪ بس منهم هنا اللي بيقدروا يوصلوا لهدفهم.
وده كان بحث “دكتور ريتشارد وايزمان ” قام على مجموعة من ٥٠٠٠ شخص، كلهم عندهم اهداف، وفي اخر التجربه لقى إن ٥٠٠ شخص بس منهم هما اللي قدروا يوصلوا لهدفهم.
طب ايه سر الـ ٥٠٠ شخص دول !؟
سرهم هو طريقة تفكيرهم واستراتيجية تخطيطهم للهدف كانت مختلفه عن الباقي، وتعالوا نعرفها سوا:
-
انهم كانوا بيركزوا على الهدف مش المشاكل اللي بتقابلهم اثناء مشوار حياتهم
-
انهم اعتبروا المشاكل مجرد تحديات بتعلمهم مهارات جديده هيكملوا بيها حياتهم مش بس لحد ما يوصلوا لهدفهم
-
اهدافهم كانت مش بس بتحققلهم هم نجاحات، لكن كانت متصله بالناس اللي في دايرتهم، يعني مش بتحقق مصلحة شخصيه وبس لكن كمان بترجع بالفايده على الناس اللي حواليهم .
انت كمان تقدر تركز عينك على هدفك اللي عايزه و تعتبر العقبات اللي بتقابلك في السكه هي عباره عن فرص تعليم لمهارات جديده تكمل معاك لهدفك ولحياتك كلها، عرفت تنشن ازاي على هدفك اللي جاي ؟!
