يوستينا نبيل تكتب: ازاي عقلك بينتج ويخرج تصرفاتك وردود أفعالك

صباح الخير،Bonjour، Good Morning, Guten Morgen ، طيب، ماشي، اوك، إشطه، peace.. دي كلها مجرد حروف بلغات مختلفة، احنا اللي اديناها معنى، وعرفناها بالوراثة والحداثة و الانفتاح، ودايماً اللغه بتطور، وبتتغير، واللي زمان كان عيب دلوقتي بقى عادي واللي زمان كان عادي دلوقتي له معاني من وراه تخليه مبقاش عادي.

طب ايه العمليات اللي بتحصل جوه دماغنا عشان نفهم الكلمات والمواقف اللي بتحصل بالشكل دا؟! تعالوا نلعب لعبة الاول من ألعاب العقل اللي اتكلمنا عنها المقال اللي فات.

ارسم شيء مألوف بالنسبالك بأدق تفاصيله اللي هتفتكرها ليكن ورقة ١٠ جنيهات مصري أو ورقة شيكولاته بيمبو، بس هترسمها الاول وبعدين هتقارنها، مش مهم تكون بتعرف ترسم المهم ترسم التفصيلي بأي شكل يقربها في مكانها اللي فاكره.

ليه انت افتكرت تفاصيل وعقلك تناسى تفاصيل تانيه !؟ ليه ممكن يكون حد رسم القديم منه وناس رسمت الإصدارات الجديده سواء من البيمبو أو الـ ١٠ جنيه !؟ ايه اللي بيتحكم في عمليات الاستقبال للمعلومات والمواقف ؟!

الحقيقة انهم عدة عوامل مش عامل واحد، بس خلونا نشرح الاول ايه اللي بيحصل لما بتتعرض لأي موقف بنبدأ نستقبله بالحواس والاستقبال دا بيختلف من شخص للتاني لأن فيه ناس بتستقبل اكتر بعينها، وفيه بالسمع، وفيه بالروايح والملمس بيكونوا افكارهم عن اللي بيحصل، ومن خلال دا بيتم معالجة البيانات اللي دخلت العقل ب ٣ فلاتر:

١- مسح للمعلومات اللي مش مهمه بالنسبالك، زي ما يدخل شخص مكان يقول حاجه فأنت بتركز مع اللي بيقوله او شكله ومتركزش مع اللي بيقوله ودا بناءاً على انت بتستقبل المعلومه ازاي؟

٢- تشويه للي بيحصل ليلائم رغباتك، حاجه شبه السراب اللي عقلنا بيشوفه لميه لو احنا في صحرا او على طريق طويل..

٣- تعميم من أجل انك تربط اللي انت عارفه بالجديد للتعلم او لحماية نفسك على حسب الموقف.. ودول بيتدخل فيهم بشكل مباشر خبراتك ومعتقداتك، لغتك، ذكرياتك، قراراتك، الوقت اللي بيحصل فيه الموقف، طرق تفكيرك.

فبالتالي بعد العملية دي بيكون لك رد فعل، يعني ردود افعالك بتحصل بعد العملية دي كلها من انتاج واخراج عقلك، مش بناءاً على حقيقة الموقف اللي حصل، عرفت ان عقلك بيخدعك وان مفيش حقيقة اصلاً!! الحقيقة هي الحقيقة بالنسبالك انت مش بالنسبه للي فعلاً حصل.

وبالتالي في العلاقات اعرف اننا بنشوف الناس وتصرفاتها بنضارتنا احنا مش بحقيقتهم، والنضاره دي بقى اتعملت من خلطة معتقدات اتكونت على مدار سنين من اول ما اتخلقت فينا الروح لحد اللحظة اللي بنتكلم فيها دي، يعني ممكن اشوف شخص لطيف ودمه خفيف وحد تاني هيشوف نفس الشخص دمه تقيل وميعرفش يتعامل معاه؛
طب ايه!؟ تفتكر ينفع بعد كده نستمر في إصدار الأحكام السلبية على بعض!
وحتى الإيجابية منها، الله يباركلك برضه متمسكش فيها اوي، عشان دا اللي بيسبب الصدمات من مجرد تصرف حصل بيبقى عكس اللي شافته نضارتنا، وخليك فاكر نضارتك انت اللي بتشوف، يعني بتشوف اللي جواك مش الحقيقه اللي بتحصل.

دمتم في وعي.