نسرين طارق تكتب: الإعلام الأجنبي.. فخ التصديق ووهم المهنية

هنحكي النهاردة عن الحيلة النميسة اللي بتستخدمها وسائل الإعلام لتوقعك في فخ تصديقها.

نعم أقصد كلمة “فخ التصديق” يعاني الكثير من أفراد المجتمعات العربية من عقدة الخواجة، وان أي حاجة بيعملها أو بيقولها هي الصح دايما.. حتى لو أثبت لهم العكس.

عندما تقرأ عنوان أو خبر أو تصريح أو مقال منسوب لجريدة أو موقع أجنبي حتى ولو كان الموقع ده مش بير سلم ده قاع بير السلم، مجرد ذكر أنه موقع أجنبي بيلغي أي شبهة أن الكلام يكون غلط أو محصلش أصلا، فما بالك لو كان الموقع أو الجريدة صاحبة الخبر ذات اسم كبير.. بتنقل وقتها الخبر على أنه كلام مصدق وتلف بيه على السوشيال ميديا وتقول قناة”  CFF”  (مثال لإسم قناة تخيلي) قالت كده، وكأنه قرآن.

تعالوا نشوف الحكاية ايه من جوه الكواليس..

في دول معادية لبعض بيعملوا ايه.. مؤسسة أو شركة تابعة لدولة تشتري الموقع الإخباري الكبير ده.. وزي ما كلنا عارفين مفيش إعلام محايد.. الموقع بينفذ كلام صاحب البيت اللي بيصرف عليهم.. يبدأ الموقع مع المشتري الجديد يكتب مقالات وتقارير وأخبار وهيصة كبيرة يعمل بيها ضغط في موضوع محدد قاصدين لفت الإنتباه للمأساة اللى بتعملها الدولة المعادية.

مثال على ذلك لما مجموعة من المواقع الأجنبية في وقت واحد كلهم كانوا بيكتبوا عن الاختفاء القسري لبعض الشخصيات في مصر.. تقارير كتير وصور وفيديوهات.. وصعبانيات كتير على حال حقوق الإنسان في مصر بسبب الاختفاء القسري للناس.

النتيجة بعد الضغط الكبير اللي حصل من وكالة أنباء كبيرة مع مواقع تانية كتير أوي نقلت عنهم على أساس ان انهم مستحيل يكدبوا.. الناس بدأت تصدق أن في فعلا اختفاء قسري.

والمفاجأة اللي حصلت بعد كده.. كل الأشخاص اللي قالوا اسمائهم في التقارير ظهرت فيما بعد في أماكن تانية خارج مصر، اللي منهم لقوه انضم لداعش واللي سافر السودان وغيره وغيره.

يبقى اللعبة هنا عليك انت شخصيا، انك تصدق الكلام ده علشان اللي قاله موقع أجنبي.. والسؤال البديهي اللي بيظهر وقتها.. المواقع دي مصلحتها ايه؟.

أظن انك عرفت الإجابة..

واللي حاصل من كام يوم أكبر دليل على هذا الكلام.. أغلب المواقع الأجنبية زي BBC و يورونيوز ومن على شاكلتهم، كلهم في نفس الوقت صوروا تقارير فيديو وكتبوا أخبار كتير جدا عن السودانيين اللي مصر رحلتهم “تعسفيا” محدش سأل اشمعنى دول بس اللي اترحلوا؟

كلنا شايفين ملايين السودانيين اللي انتشروا في كل شبر في مصر.. يعنى جت على الـ كام ألف سوداني دول وزنقت معانا؟

ليه دول بالذات منظمة العفو الدولية طلعت تقرير سريع عنهم.. هى المنظمة مش شايفة آلاف الفلسطينيين اللي بيترحلوا قسريا من منازلهم مش من بلد غير بلدهم!!

دخول أي دولة بيتطلب تأشيرة وتصاريح لو صعبانين عليكم ما تاخدهم عندكم!!

والمواقع العربية من المواقع الأجنبية اللي “مبتغلطش”.. أن مصر طردت السودانيين بطريقة تعسفية.

هي دي اللعبة أنه ينشر أخبار وتقارير في مواقع أجنبية علشان أنت كمواطن مصري تتأكد أن الخبر صحيح وتقول أصل الناس دى مهنيبن وعارفين، وأن الدولة عندنا “هتطرمخ” على الخبر لكن دول ملايكة ميعملوش كده.. وعايز تعرف الأخبار الصح شوف موقع كذا أو كذا.. اللي هو اصلا بيكتب اللى عايزه الحاج صاحب البيت اللي بيستغفل الكل.