وتستمر الأخطاء الطبية بدون وقفة حقيقية: قارئة نشرة شهيرة تحكى معاناتها مع دكتور عيون معروف كاد ينهى على حياتها العملية

متابعة – غرفة التحرير

في خطأ طبي جديد كاد ينهى الحياة العملية لمذيعة معروفة، كشفت قارئة النشرة «شروق عماد الدين»، التى عرفناها في قناة النيل للأخبار، وانتقلت إلى قنوات المتحدة للأخبار، في بويت تفصيلى على حسابها على الفيس بوك، مدى معاناتها مع طبيب عيون، كاد يفقدها نظرها، ويدمر حياتها كلها، لا العملية فقط.

وتقول شروق، انهارده أنا بكتب البوست ده وفى دماغى حاجات كتير متلخبطة وعكس بعض، أولها أنى مابحبش حياتى الشخصية تبقى عالسوشيال ميديا، وفى نفس الوقت عشان أتكلم هضطر أحكى حكاية شخصية مريت بيها ولولا أنى عايزة أوعى الناس وأدى ناس تانى أمل ماكنتش فكرت أكتب البوست ده.

أنا شروق عماد الدين المسمى الوظيفى بتاعى من أول يوم شغل هو قارئة نشرة وتعليقات إخبارية.. حياتى وشغفى وحبى هو شغلى الحمد لله ربنا فاض عليا كتير بنعمه واكتسبت خبرات على مدار السنين ده لأنى زى ما قابلت ناس صعبة ومستحيلة قابلت نماذج طيبة ومعطاءة استفدت منهم واتعلمت بشكل مباشر وغير مباشر ومرت السنين وأنا بتنقل من مكان لمكان وحلمى بيتحقق وبيكبر وفى يوم وأنا عالهوا فى نشرة 6 حصلى أغرب موقف ممكن حد يتعرضله لاقيت نفسى مش عارفة أفسر الكلام اللى أدامى ومش قادرة أميزه قولت أكيد إرهاق أو بسبب أنى مابكلش كويس.

وبسرعة روحت لدكتور العيون اللى المفروض أنى بتعامل معاه قالى لازم نعمل ليزك دول شوية ضعف نظر وموضوع بسيط.. ظروف شغلك إيه وبتقرى من على بعد أد إيه جاوبته وزودت كمان أنى بتعرض لإضاءة عالية عملنا الليزك ونزلت الشغل بعد 48 ساعة بتعليمات من الدكتور لاقيت الموضوع أسوأ فى حين أنى على ما إتحضرت لليزك كنت نزلت فالنص شغلى وماكنش فى أى مشكلة بس طبعا تحسبا أن الموقف ده ممكن يحصل تانى وثقة فالدكتور أنا خضت تجربة العملية.

ويأتى الأصعب أن حالتى ساءت جدا بتعامل فى كل حياتى كويس قياسات نظرى 6/6 لكن انا مش قادره اتعرض لإضاءه ومش قادره أقرا من على بعد وبشتغل بصعوبه، رجعت للدكتور قالى حجج وأسباب بدون تفاصيل كلها واهية ..جفاف فالعين.. المخ هيتعود عالرؤية الجديدة.. اصبرى 10 أيام ..اصبرى 3 شهور طيب نشيل الليزك .. كنت طبعا فقدت ثقتى فيه ورافضة أى حل من ناحيته أخدت لفتى عند أشهر وأشطر الدكاترة بترشيحات من المعارف والأصدقاء وبقيت بلف فى دوامة كلها حجج وكلام مالوش آخر وجر رجل فالأول أننا نعمل عمليه وبعد شوية طيب نستنى 6 شهور.. نهاية ب لأ مش هقدر أعمل عملية.. انتى نظرك 6 قومى يابنتى روحى.. وترشيحات لدكاترة فالخارج وتواصلت فعلا مع دكتور فى اليونان وكنت هسافر والحمد لله أنى ماسفرتش.. أما عن الاستغلال والاستنزاف المادى فحدث ولا حرج كان موجود طول الوقت واللى يعتبر اقل ضررا فالحكايه مقابل الاستنزاف النفسى والمعنوى.

لغاية ما شىء قدرى( ممكن أبقى احكيه فى مره تانى ) خلانى أروح لدكتور فى اسكندرية.. أنا ليه عاملة البوست ده ؟ عشان أوجه رسالة للدكاترة
قول ده مش تخصصى أنا مش متخصص فالنقطة دى ده مش هيقل منك بالعكس

أرجوك قبل ما تقول لحد أن مفيش أمل وأن لازم تتقبل وضعك الجديد فكر بينك وبين نفسك أنت بتعمل إيه فى حياة اللى أدامك وبتدمر نفسيته إزاى مش عشان حاجه غير أنك (مش عارف)

أخيرا راعوا ضميركوا فى الناس ماديا لأن لو أنا قادره فى غيرى هيحسوا بالعجز أن حتى الحلول الوهمية مش قادرين عليها مع ملحوظة أن المريض بيتعلق بأى حل.
طيب أنا ايه اللى حصلى أنا اتعملى عملية ليزك عشان أشوف بيها القريب فقط لا غير استغناءا عن نضارة القراءة اللى أصلا عمرى مالبستها!!

والعملية دى غير مناسبة مع شغلى اللى بقرأ فيه من على بعد ٨ أو ٩ متر ..ليه الدكتور عملهالى وشرحلى أنه عمل حاجة تانى !! معرفش.

الدكتور كمان عمل العملية بنص تعليق الدكاترة( العملية معمولة مش بمهارة)
الرسالة التانية للناس فى حاجة اسمها #مضاعفات_ليزك وكوالتى الرؤية مالهاش علاقه أبدا بقياس نظرك اللى هو ٦/٦ أرجوكوا فيه حلول ماتصدقوش مشاهير الدكاترة.

الحمد لله ربنا كتبلى أنى استعيد حياتى على إيد دكتور محمد شفيق شاهين، شكرا لصدقك، شكرا لتحملك ليا فى عز يأسى شكرا أنك لم تمل فى إجابات سيل اسألتى وشرحك الوافى المقنع والمنطقى وأخيرا شكرا لثقتك فى نفسك اللى بيكون ليها تأثير ساحر عالمريض.

وزى ما فى الوحش (بلدنا فيها دكاترة والله من أمهر مايكون ) مش كلهم بيحبوا الشهرة
و أخيرا دعواتكو بتمام الشفا.