نسرين طارق تكتب: استعديتوا لرمضان!!

اقعد مع نفسك شوية وفكر.. انا استعديت لرمضان ازاي؟

موسم رمضان يبدأ من اول باقى 100 يوم على رمضان، واللهم بلغنا رمضان.. وتبدأ معاه فيديوهات الاستعداد لرمضان وبوستات كتير على كل المنصات بتوصف خطوات الاستعداد لرمضان.. كل ما افتح فيديو اتفرج عليه الاقى الكلام على التفريز والتخزين وعمل شربات الكنافة للشهر كله ووصفات لأكلات مش بنعملها طول السنة.

هو ده الاستعداد لرمضان.. تحس ان الناس صايمة طول السنة وبتاكل في رمضان بس.. هو مش العكس هو الصحيح ولا انا فاهمة غلط؟.

طوابير في كل محلات السوبر ماركت والياميش.. احنا تقريبا نسينا حاجة مهمة جدا.. ايه الحكمة من الصيام؟

هل الحكمة ان ربنا بيحرمنا من الأكل طول النهار علشان بعد اذان المغرب نلتهم كل كميات الاكل دي؟

اعتقد من وجهة نظرى ان ربنا أمرنا بالصيام لتدريب النفس على الانقطاع.. انقطاع عن الشهوات.. انقطاع عن الحاجات اللى بنحبها.. وانك ازاى تقدر تتحكم في نفسك عدد الساعات ده.. معناها اثبات انك تقدر تتحكم فى شهواتك.

زمان قالولنا ان الصيام فٌرض علشان نحس بالغلابة.. طيب ما الغلابة نفسهم بيصوموا معانا.. وهل اللي بيحصل فى موائد رمضان ده ليه علاقة بالاحساس بالغلابة؟

الصيام تدريب للنفس مش للمعدة.. تدريب ان كل حاجة موجودة حواليك وانت متحكم في نفسك وكابح شهواتك عنها.. فرصة لترويض النفس وتهذيبها.

مع الوقت والعادات الرمضانية الجميلة اللي مش موجودة غير في مصر.. تحول رمضان لشهر الأكل والتخمة.

شهر التفريز والتخزين وجمع كل ما لذ وطاب فى التلاجة واستهلاك كميات كبيييرة من الحلويات.. وكل سنة نخترع كنافة بالمانجا وكنافة بالقطايف وكنافة بالفلفيت.. فين رمضان بتاع الروحانيات والتقربي الى الله؟.

لو سمحتوا رجعولنا رمضان بتاع زمان!

كل سنة وانتو طيبين وبخير وبعودة الأيام.