![](https://www.egypt2.com/wp-content/uploads/2024/04/مقال-ابارهيم-1.jpg)
إسرائيل كل شوية تطلع تصريحات من نوعية ان حماس لسه قوية ولابد من استمرار العمليات العسكرية.
تطلع الجزيرة بتصريحات لحماس انهم فعلا أقوياء ولسه قادرين على حرب طويلة.
طيب المشكلة فين؟
المشكلة ان حماس والجزيرة بيأكدوا حجة إسرائيل للاستمرار في الحرب.
التوجه الاستراتيجي الصحيح لحماس والجزيرة كان لازم يبقى اظهار ان حماس بتفقد قواها علشان حتى المجتمع الدولي يبقى عنده فرصة للضغط أكتر على إسرائيل لوقف الحرب.
دا مش عيب.
مش عيب انك تناور من أجل الحفاظ على دماء شعبك.
لكن العيب انك تقعد تقول ما وجعتنيش والحقيقة ان شعبك أتوجع ومات.
أضرب وقاوم وإعمل في عدوك خساير.. بس بدون الإعلان والمنظرة الفارغة.
يا أخي اتعلموا من إسرائيل..
هرستكم ودمرت غزة ولسه بتقول ما حققت أهدافي ولا انتصرت وبتعظم من الضربات التافهة اللي بتجيلها من حماس.
الحقيقة ان حماس والجزيرة بيساعدوا إسرائيل لقتل باقي الفلسطينيين وبيقدموا لها الذريعة على طبق من فضة.
تعالى شوف القاهرة الإخبارية.. مطلعة الفلسطينيين غلابة، وإسرائيل الوحش الكاسر.
هي دي الاستراتيجية الصح.
هو دا اللي لازم يوصل بره.
دا اللي يساعد القيادة المصرية للضغط على الخارج من اجل مساعدتها لوقف الحرب.
بس للاسف الجزيرة هي اللي واصلة بره.
تخيل الوسطاء الدوليين اللي بيحاولوا يوقفوا الحرب وهما بيتفاوضوا مع أوروبا ولا أمريكا وبيقولولهم غزة انتهت والناس ماتت.. انا متخيل وهما بيترد عليهم بجملة “انتو ما بتشوفوش الجزيرة ولا بتسمعوا بيانات حماس ولا ايه، دا حماس مبهدلة إسرائيل، وإسرائيل هي اللي محتاجة الحماية”.
إسرائيل بتلعبها إعلاميا صح.
وهي اللي بتسرب للجزيرة لقطات معينة تطلعها منهزمة.. والجزيرة بغبائها بتذيعها مع فيديوهات حماس البطل الذي لا ينهزم.
دي اجابة السؤال بتاع هي الجزيرة بتحصل على اللقطات دي ازاي.
قولنا كتير ان الإعلام سلاح فتاك.
ومحدش مستوعب الكلمة.